女子成人游泳班裡的異象:同學交住學費,來幫手點名同… 教學生?

學游水,除了學一門求生技能,更可以看到人生百態。同學交了學費來跟我們學游泳,是否就等於橋埋對手等教練來服務佢哋?定係,一班同學都會好有 Team Spirit,齊上齊落同聲同氣互相幫忙?香港人,出了名好冷漠,但係,我們的同學有陣時都好友善好熱情㗎。今日就由我們女子成人游泳班嘅教練,同大家分享一下最近游泳班見到的奇景。

同學有時比教練更關心其他同學

在小班教學的女子成人游泳班裡,一班女人,無論年紀差別幾多,早來學遲來學,都好容易混熟大家打成一片!我相信,係因為佢地一齊經歷過「死咁滯」(攰死浸死定點死?比啲想像空間你)的經歷,所以一齊 Friend 得特別快。

每次游泳課開堂,做熱身的時候,最常聽到嘅對話係:「呀XX(同學個名)未到嘅?佢有無請假?」

懵懵教練就會好懵咁問:「吓?我唔記得名喎,邊個呀?」

咁同學就會嘗試去形容一輪,嗰位缺席同學的身形年紀件泳衣顏色:「呢,廿幾歲面尖尖眼大大高高哋藍色泳衣幾靚女嗰個呢~」

講完之後再望實教練,要求教練回應,交代返同學係咪事假M假抑或唔舒服… 呢啲情況教練已經習以為常,也無咩奇怪。當然,答唔答到,係另一件事。

見到教練茫然的表情,同學們唯有無奈放棄。

同學有時比教練更熱心

而上一堂,懵仔教練又喺課堂上見到新異象!

咁我地嘅女士班呢,為了提升學習效果,就係按程度分組教嘅。有時同一班五六個同學,會按程度將同學分開兩三位為一組去學習。有啲初學游泳的初級組學員就喺池邊練習啦,有啲游得比較叻嘅同學就會安排佢哋喺公海(泳池中間)練習… 我個晚,教完公海嘅同學啦,一轉身,就見到池邊有幾個初級組的同學圍埋一齊,互相交換心得,仲互相扶持,互相幫忙扶住對方練習咁添…

慢慢由池中心行返埋去,我見到佢哋咁熱心咁積極,仲識得互相幫忙,都實在係好滾動呀!

既然係咁,我就一於繼續靜靜地旁觀佢哋啦…

同學仔忽然之間發現左我,就同我解釋:「我地都係剛啱學識,所以比較知道大家嘅需要呀!」講完,就擰轉頭繼續教果位初學嘅同學…

嗰一刻,我個腦冒咗個句出嚟:「無我既事,咁我返出去做野先…」

同學們,你哋交住學費來幫手點名同教其他學生,真係好可愛呀!


戴頭盔利申:「故事人物純屬虛構,如有雷同,實屬巧合」